الحب كلمة من حرفين من غير كلام يقولوها اتنين

كلام جميل وحلو وطعمه حلو وشكله حلو لكن زي ما بيقول اخواننا السواقين ما بياكلش عيش

عايز تحب املي جيوبك يا حلو علشان ربنا هايكرمك باللي تفضيهولك

وتمشي بقي سعادتك متبخترا ومتمخترا ومتنيل علي عينك رايح فين ؟؟ رايح للحته .. او رايح للمقطورة .. او رايح للجماعه علي حسب نوع الثقافة اللي سعادتك بتنتمي ليها

بصراحة كدة ومن غير لف ولا دوران الحب انتهي
اللي عايز يحب يتفرج علي الأفلام القديمة ويشوف الناس كانت قد ايه رومانسية ومستمتعه بكل لحظة في حياتهم

احنا بقي ربنا يتولانا

اصل هي كدة .. مفيش حد بياخد كل حاجة

هما كان عندهم راحة البال والرومانسية والهدوء والمواصلات فاضية والرغيف كبير بس كان عايشين علي لمبة جاز وياكلوا علي وابور الجاز

اما احنا بقا احفاد بيل جيتس فلدينا كل التكنولوجيا التي تمكنا من ان نعيش ونمارس كل حياتنا عن بعد بالريموت كنترول كلها راحة وانتخه وتفخيد ولكنها حياه يا اعزائي المناضلين بدون هدف ولا معني ولا رائحة

حاجة كدة مالهاش ملامح

محدش عارف هو عيز ايه بالظبط ولا هو عايز يبقي ايه بغض النظر عن الجانب المادي

الطموح كله دلوقتي بقه عبارة عن زكايب فلوس متعبية باحكام وعربيات اخر موديل ومزارع واراضي وعمارات دون رضا.....................

في حد راضي دلوقتي .. اللي معندوش عايز يبقي عنده .. واللي عنده عايز يبقي عنده اكتر

البركة في الرأسماليه اللي حلوتنا من بشر الي الات كل هدفها تحقيق المال ولو كان علي حساب اي شخص مهما كان قريب

ويقولك ايه ؟؟؟ راس المال مالوش قلب .. طبعا مالوش قلب .

اللي يبيع المصريين ويعيشهم في الجحيم دة علشان ثروته تكبر حتي تعدت 40 مليار جنيه يبقي مالوش قلب ولا ضمير ولا ينفع يبقي بني ادم

ربنا يرحمنا منكم ... يعني نهرب من الاشتراكية وويلاتها والحاكم الواحد والحزب الواحد وزوار الفجر لكي نجد انفسنا مباشرة علي موعد مع اكلي لحوم البشر اللي هما الراسماليين الجشعين اللي عايزين ياكلونا احياء

رحمنا الله برحمته وصبرنا علي مصائبنا التي لا تنتهي

الحمد لله ان انا لسه عايش لغاية دلوقتي

الاكتئاب هو منفس يخرج به الله تلك البراكين الغاضبه من داخلنا حتي لا ننفجر