في منتصف الطريق .... وعلي حافة الأمان .. تنتابني حاله لا أعرف كيف أصفها ممكن تكون حاله من الملل من طول المشوار او ممكن تكون حاله من الاحباط من كثرة المصاعب التي تعوقني عن تحقيق احلامي .. ربما كلامي هذا قد يعتبره الكثيرون دعاة الفتاكه والفهلوة انه ينطوي علي كثير من السذاجه وعدم فهم الواقع الحالي ، ولكنني وعلي الرغم من ذلك لا زلت اري في ما اشعر به شعورا انسانيا راقيا ... علي الاقل لا زلت اشعر بشيء ما وهذا بلا شك خير من ان لا اشعر علي الاطلاق ... وهذا من وجهة نظري الخاصه جدا جدا ( حتي لا نقع في محظور تكدير الراي العام او السلام الاجتماعي او .....) انجاز يستحق الاهتمام رغما عن كل المنغصات اليوميه التي تكدر صفو كوكب اخر مش بلد واحدة ... الا اني والحمد لله لا زلت اشعر .... يا لها من سعادة تلك التي اشعر بها ... يا ليتني كنت بنتا الان حتي ازغرط لنفسي علي هذا الانجاز التاريخي ومبروك لمصر علي شاكلة ما تفعله وسائل الاعلام المصري العقيمه علي الفاضيه والمليانه ... ايه ده .. ايه اللي انا بقوله ده ... انا مش عارف انا بقول ايه ... معلش يا جماعه دي حاله طبيعيه جدا بتحصلي علي فترات كدة لما بحس يعني او ... اسف مش بشعر بس بفتكر ان انا بني ادم وليا حقوق كما يدعي الاعلان العالمي لحقوق الانسان .

سحقا لتلك السياسه المتخلفه التي لم تتمكن حتي الان منذ الاف السنين ان توفر للانسان حياه كريمه وامنه .... الحقيقه انا رايي نرجع لحياة الغابه احسن وكل واحد ياخد حقه بدراعه وتبقي كل حاجة علي المكشوف احسن ... افضل من اننا نقعد نخدر في الناس ونقولهم علي راي اخينا واستاذنا الفاضل / صلاح عيسي الدوله المدنيه والحفاظ علي مكتسبات الشعب .... ايه ده .؟؟ تاني ؟؟ رجعت اهيس تاني اهه .. مش عارف اعمل ايه في الحاله دي يا جماعه ؟؟ يعني اصوت يقولوا الراجل اتجنن ؟؟؟

كل حاجة بشوفها او بسمعها او باكلها او بشمها او بلمسها بتقول .. مفيش حد عايز الحكومه دي ولا السلطة دي ولا النظام دة ... ومع ذلك هذا كله لا يهم المهم الكبار عايزين ايه وعايزين مين ... مش حاجه تجنن النبي ،، لا وتسمع الكلام بقه وهما بيقولولك ايه بقه .... الديموقراطيه .... اول رئيس منتخب ... انتخابات مجلس الشعب ..

كل هذا من وجهة نظري هو ضحك علي الدقون ... من الاخر اللي بيحكم مصر يا جماعه قعدة عرب ... ريسها معروف ورجالته معروفين ...والمستفيدين معروفين ،وكل الكلام الباقي ده يا عيني بنج ... ايوه بنج زي بتاع دكتور السنان بعد الشر عنا وعنكم ... لما يحب يعمل حاجة غصب عنك يقوم يعمل ايه ؟؟ ..... يخدرك يديك حقنة بنج بتاع 2 متر .... ماشي ماشي ... طب مشيها بنج بس دلوقتي .. يا عم علشان خاطري برضه في ناس محترمه بقرا ما ينفعش تقرا الكلام ده هنا ... اوك ربنا يخليك يا رب ..

المهم ما طولبش عليكوا قولوا طول ...هو انا كنت بقول ايه ؟؟؟ اه ... البنج ... اولا مفيش حكومه .. طبعا صدمه هه ؟؟ ايوه يا عم دول شوية موظفين بيقبضوا علي قلبهم قد كدة علشان يعملوا اللي المعلم عايزة ويقعدولهم بتاع جمعه ولا جمعتين في الوزارة وبعد كدة باي باي ... وييجي غيره ... ويطلع رئيس الجمهوريه الموقر يقول البيان ايه يقول : يا حكومه ... عايز كذا وكذا وكذا .

مش فلوس طبعا لكن تعليمات وهما ينفذوا او ماينفذوش بقه هما هايقطعوا نفسهم يعني ؟؟

ونقول ونعيد ونتكلم ما احنا في دولة الديموقراطيه ... والديموقراطيه يعني حريه ... يعني نقول زي ما احنا عايزين ... انما برضوا الراجل مش هايعمل كل ده هو حر برضه يعمل اللي يعجبه واللي ما يعجبوش طبعا مايعملوش ... هي يعني الديموقراطيه تيجي عنده هو وتقف .. اما عجيبه يعني ... اما الجميل في الموضوع هو مجلش النهب .... قصدي مجلس الشعب .. الا هو فين الشعب ... يا واد يا علي انده يا واد عيل الشعب اللي عندك ... لا لا مؤاخذه الشعب ده بتاعي انا بقه ... معلش بقه كل واحد حر في شعبه .

مجلش الشعب لا يعبر عن الشعب .

حقيقه لا تقبل الجدال من احد.

الحزب الحاكم بامره لا يملك من اصوات سوي ما يقرب من 30 % من اصوات الشعب ومع ذلك يحكم منفردا ... حاجه عجيبه جدا ومتفرده ... مصر دي فعلا ام العجايب .

المجلس لا يمثل .... والحكومه موظفين .... والشعب مش موجود .. امال انا خانق نفسي وخانقكوا معايا ليه ... هي فين اساسا البلد دي اللي بتكلم عليها ... ييييه ... اديني رجعت تاني للتهيئات ... ربنا يعافينا ويعافيكوا منها ربه

كل سنه وانتوا طيبين