سؤال محيرني بجد ::::::::::::::::::::::::::::

احنا ليه بنحب نفسنا قوي كدة ؟؟؟؟

رغم كل المساوئ اللي ماليانا من فوق لتحت

الا اننا بنحارب في الناس علشان نكوش علي كل حاجه لنفسنا

مجرد سؤال :: مش عارفله اجابه

او بقوله بس من احباطي ويأسي

لنا الله

حاسب ... الإخوان المسلمين هيعضوك !!

ليس هذا عنوانا لمسرحيه هزليه علي احد مسارح الولايات المتحده التي نعرف ان لديها تار بايت بينها وبين الاسلام بكل تياراته واتجاهاته ...لا ليس كذلك

بل هو في واقع الامر عنوان لأسخف حمله اعلاميه شنتها اجهزة الاعلام الحكومي ضد جماعة الاخوان المسلمين في مصر بمناسبة التعديلات الدستوريه التي تهدف في معظمها الي تكريس الفكر السلطوي المركزي لصالح النظام القائم .

علي الرغم من انني لم انتمي في يوم من الايام لا سياسيا ولا حتي فكريا الي هذه الجماعه .... وهذا ليس عيبا في او فيهم ...

ولكن هناك فرق كبير بين ان تعمل في سياسة اليوم بكل متغيراته وبين الادعاء بانك المسئول عن الاسلام في البلد كلها وكان من يعارضه سياسيا هو خارج عن المله او ما شابه

فنحن اذا لن نخرج من عبائة احتكار السلطة الذي نعاني منه منذ عقود طويله ، الا انني رغم ما سبق وجدتني مذهولا بكمية الحماقه والسخافه وغياب الفطنه علي كافة مستوياتها .... في ما تقوم به كافة وسائل الاعلام الحكوميه الحزب وطنية من هجوم ضاري ومكثف ضد جماعة الاخوان المسلمين وتصويرهم للمجتمع وكانهم بعبع سوف يبتلع الناس في الشوارع .. قال وايه كمان سوف يهدد كل المكتسبات الوطنية التي حققها الوطن ... قال وايه كمان .. سوف يحتكرون السلطه في مصر ولن يسمحوا بتداول امن وسلمي للسلطه في حال وصلوا لسدة الحكم ... انا مش مصدق ان الاخوان المسلمين هايعملوا كدة يا اخي ... هو في حد في الدنيا ممكن يعمل كدة ...

تصدقوا بالله انا لما سمعت الكلام دة في الاول فكرتهم بيتكلمواعن مصايب الحزب الوطني التي لا نحتاج لاحد لكي ينشط لدينا القدرة علي التخيل علشان نخاف منهم ....

احنا بالفعل يا اخواننا في الحزن الوطني نعاني من تصرفاتكم الحمقاء والمتخلفه كل يوم وكل ساعه ولا نري بعبعا ابتلع مصر في بطنه سواكم ...

اريد ان اوجه رسالة صدق لكم يا رجالات السلطه ... نحن نحب الاخوان .. لانهم اقرب لنا منكم يا حفنة لصوص ... انهم يقدمون لنا وهم جماعه محظورة ما لم تستطيعوا انتم ان تقدموه وانتم تحكمون مصر منذ ربع قرن .... وبامكاننا ان نتحمل وصول الاخوان المسلمين الي السلطه طالما تحملناكم ... فلم يعد لدينا بفضلكم ما نخشي عليه لقد دمرتم بكفائه نادرة اي بصيص للامل في نفوسنا في ان نعيش حياه كريمه دون ان نهان ونسرق كل يوم ....

قال ايه الاخوان المسلمين هايكلونا قال .... ياكلوا فينا ايه ده احنا بقينا عضم علي لحم والحمد لله ... اولادنا مشردون علي القهاوي .. مرتباتنا لا تكفي رغيف العيش اللي كله مسامير ... فواتير الكهرباء والمياه والتليفون قضت علي المرتب ..اصبحنا في رحلة غير مضمونه العودة اذا فكرنا نركب قطار او باخرة ...والمصايب لا حصر لها ...

... اعزائي الديكتاتوريين السلطويين الوصوليين ... عفوا .. لقد نفذ رصيدكم من المصداقيه ... نحن نصدق العفريت ولا نصدق كلمه واحدة من شفاهكم التي تعفنت من الكذب علي هذا الشعب المسكين ...

من الاخر .. نحن لا نحبكم .. ولا نصدقكم .. ونعلم يقينا انكم انتم من سرقتم قوتنا .... ايها الحزب الضعيف بدلا من ان تهاجموا الاخوان المسلمين وهم جماعه محظورة .. عليكم ان تقووا انفسكم من الداخل ... وما تفعلوه الان ليس الا تعبيرا صادقا عن الخواء الذي يملأكم

ليس لديكم برنامج ولا فكر ولا استراتيجيه للخروج من هذا المستنقع الذي اوقعتمونا به ....

كفاكم كذبا وانصحكم ان تفعلوا خيرا وتتركوها لغيركم فهو بلا جدال افضل من تلك الحاله المترديه التي وصلنا لها والفضل لكم يا سادة يا محترمين

كفاكم هدرا لمقدرات الشعب ... بدلا من انتاج ساعات طويله من البرامج الاذاعيه والتليفزيونيه_ الذي ندفع نحن الشعب ثمنه _ في مهاجمة الاخوان المسلمين والذين ترونهم تهديدا لكم ولاستمراركم علي قلب البلد وقلبنا ... اعملوا بالفلوس دي حاجة مفيدة ، جوزوا بيها شاب ولا اتنين حتي تبقوا عملتوا خير ربنا يفتكرهولكوا وانتم بتتحاسبوا علي كل مليم بلعتوه من دم الشعب

ولكي الله يا مصر

انا نفسيتي تعبت من البلد دي

بصراحة أنا ماعدتش قادر احب البلد دي !!

انا خلاص قرفت بلا حكومه بلا رئيس جمهورية بلا زفت علي دماغهم .

البلد اللي نظامها يسمح بحدوث القرف دة .. أحسنلها ترجع لحياة البدو والتخلف أحسن من القرف دة

عمال يقرفونا بالشرطة وكل سنه عيد الشرطة واموال للشرطة وزيادة مرتبات الشرطة ... علشان ايه ؟؟؟!!

علشان يبهدلوا فينا ويعذبونا ويتنططوا علينا .

دة ايه البلد الزباله دي ؟

انا احسنلي اروح اعيش في الصومال واخد حقي بدراعي وابقي عارف ان هو ده اخري ، من اني افضل كل يوم اتقرف بكلام اقل حاجة انه هيجيبلي الضغط والسكر وكل الامراض المستعصيه .

ما تستغربوش ... دي بالظبط الحاله اللي جتني بعد ما اتفرجت علي كليبات جديدة للتعذيب في قسم شرطة مصري

انا الحقيقه لا زلت اتذكر تعليق الرئيس الامريكي علي الطريقة اللي اتشنق بيها صدام حسين " كنت اتمني ان يعدم صدام بطريقه اكثر وقارا "

دة تعليقه علي اعدام مستحق لجزار قتل من شعبه وزملائه الالاف .... يبقي ايا كان الذنب اللي اقترفته البنت اللي في الفيديو انها قتلت .. حتي لو قتلت اعتقد اننا اتهرينا كلام من نوعية دولة القانون وسيادة القانون .. امال هو القانون يشتغل بس لما يبقي مش من حق النائب العام انه يمنع ممدوح اسماعيل من السفر بحجة انه لم يستدعي التحقيق معه او علي زمة قضيه ولما تبقي المساله كرامة الانسان المصري داخل جدران وطنه يبقي مفيش قانون

يا اخي ينعل ابو البلد اللي تمشي بالشكل دة

انا تعبت ...... ومش عارف ازاي هاقدر اقوم بعد بكرة من النوم واروح الشغل في المخروبه اللي اسمها الحكومه

منهم لله (وائل عباس و دماغ ماك )

ربنا يسامحهم علي الحاله النفسيه المطينه اللي الواحد فيها دلوقتي

اما الاشكال الزباله اللي في كل اقسام الشرطة اللي لا تتهاون في اذلال الناس واهدار كرامتهم كل يوم وكل ساعه فربنا يولع فيهم حريقه لا تطفئها مياه الدنيا كلها حتي يكونوا عبرة لمن يستهين بكرامة انسان

انا اسف اني هضطر احط وصله للفيديو بس مفيش حل عندي غير كدة

http://www.youtube.com/watch?v=VhQRFz65M6s





http://www.youtube.com/watch?v=ZQom4edkHkw